Erenge foar Heinrich Pörschke

Et rakt min Seelter, do sik so foar ju oaine Sproake iensät häbe as Heinrich Pörschke fon ‘n Skäddelerdom. Nit bloot in dän Seelter Buund hät Pörschke aaltied wiezed, dät him dät Seeltersk nai an’t Hate liech, uk tou do Seelter Woudebouke fon Marron Fort un Pyt Kramer hät er ‘n Masse biedregen. Uk wiederwai foar ju Kultuur hät Heinrich Pörschke aaltied ‘n Masse moaked: inne Doanstrupel, bie ju Fjuurweer un foar dät Täärp Skäddel bie do Beelze Bube.

Die Seelter Buund hät Pörschke deeruum in’t Jier 2021 tou Eren-Foarsitter moaked. Fergene Wieke hät Pörschke uk fonne Meente ‘n Erenge kriegen. Morere Ljude wuden foar hiere erenoamtelke Oarbaid eerd. Meenteboas Thomas Otto lowede ieuwenske Heinrich Pörschke uk: Andreas Alberts foar sien Oarbaid as Boas fonne Muziektrupel “Do Capo”, Joachim Oltmann foar sien Oarbaid in ‘n Skütsenverein “Hubertus” un in’t Teoater, un Bernhard Jakobi foar sien Oarbaid foar SV Strukelje.