Seeltersk-Kontoor bie platdüütsken Lezewädstried in Kloppenburich

Moundai, dän 15. Juni organisierde ju Ooldenburichske Loundskup in ju Akademie Stapelfeld in Kloppenburich dät Kloppenburger Final fon’n platdüütsken Lezewädstried. Henk Wolf fon’t Seeltersk Kontoor wier aan fon do Jurore foar do Bäidene fon Klasse 3.

Et wier wukkelk fluch, tou sjoon un heren, wo do Bäidene sik truch do Täkste äkkerden. Wäkke hieden aiske loange Döäntjene uutsoacht. Do Winnere an tou wiezen, wier fonsäärm stuur, man lukkelkerwieze hiede ju Organisaatsje n Masse Juroren fuunden, do do Apjääften ferdele kuden.

Hanna Remmers, Sarah-Christin Siebert un Lisa Landwehr fon ju Loundskup un Heinrich Siefer fon ju Akademie Stapelfeld hieden dän Ättermiddai aiske goud organisierd. Et wier komoudich un plezierdelk.